Seit Januar 2014 unterstützt „Landeshistoriker“ Dr. Gerhard Raff als aktives Mitglied den Theodor-Heuss-Freundeskreis Baden-Württemberg e. V.
Raffs Raritäten CMXV
Unser Landsmann und Vetter Theodor
Dr. Raff erinnerte an den vor 50 Jahren verstorbenen Bundespräsidenten Theodor Heuss.
Was soll mr/man denn da bloß mache/n? Da stoht/steht der Verf. de gschlagene/den ganzen Tag lang uff/auf dem Schlossplatz am Stand von Weihnachtsmann & Co ond/und verscherbelt/verkauft ond/und signiert außer sei/ne/m schwäbische/n Klassiker „Herr, schmeiß Hirn ra!“ (Herrgott, wirf Verstand herunter! 25.Ufflag/Auflage) au/ch no/ch sein/en ällerneueste/nagelneuen Benefizbestseller „Gerhard Raff Kann auch Hochdeutsch“. Ond/und die Leut/e ganget au/ch druff nei wie a Gaas uff en Äpfelbutze/greifen zu wie im Ostblock bei den Bananen.
Ond/und de/die oinen/einen (selbst Hiesige) saget/sagen: Endlich! Des/das Schwäbische isch/ist so schwer zom/zum Lese/n. Sie sottet/sollten en/in dr/der Zeidong/Zeitung emmer/immer hochdeutsch schreibe/n! Andere (sogar Reigschmeckte/Zuwanderer) aber moinet/meinen: Schreibet/schreiben Sie bitte obedengt/unbedingt bloß/nur em/im Dialekt weiter. Des/das Schwäbische isch so schee, des därf net aussterbe/ist so wunderschön, das darf nicht untergehen. Bsonders/besonders deutlich (hättet Ihr dees denkt?/man denke nur!) hat des/das am Sonntich/Sonntag a/ein Ma/nn aus dem große Vatterland/mit preußischem Migrationshintergrund ond/und a/ein granadamäßig/überaus gscheiter/kluger Kölner ausdrücklich wölle/wollen. En scheene Grueß!
Was soll mr/man denn da bloß mache/n? Mr/man fragt da am beste/n den König Salomo, was der jetz/t moine/entscheiden dät/würde. Und/ond der moint/entscheidet: „Mal so, mal so!“
Also denket mir heut uff Schwäbisch an onsern erste Bundespräsidente, Degerlocher Mitbürger, Landsmann ond Vetter Theodor Heuss, der wo am 12.Dezember 1963 (als wär’s erst gestern gwä) en Stuegert an seine Raucherfüeß gstorbe isch. Ond bei seiner Leich ben i vor dr Stiftskirch gstande, ond i seh jetz no die ganze Kerle vor mir, wo da eiglade gwä send, vom Adenauer über de Lübke bis zom Scheel, ond die viele, viele jonge Bürschle, schwarz wie dr Keenich Balthasar ond em schwarze Frack ond mit Zylender, älles Diplomate aus dene ganz frisch oabhängig wordene Staate en Afrika.
Ond i seh onsern Vetter Theodor („Eine schwäbische Genealogie, die über die Großmutter Kallenberger auf die Filder und nach Degerloch führt“ zu dene Raff) no leibhaftig vor mir, wie er anno 60 als Pensionär mit seiner Zigarr uff dem Bänkle em Ramsbachtal ghockt isch ond freundlich grüeßt hat ond sein Hut razoge, wie mei Muetter mit ihrem letzte Kuehfuhrwerk vom Flecke ond mir des Heu hoimgfahre hat.
Dr Theodor hat ja hie von 1945 bis 1949 en dr Löwestraß 86 gwohnt, ond mei Dote (Patentante) Aline hat schräg vis-à-vis en dr Nommer 83 a Konditorei ghet, ond da hat sei Elly emmer ihre Kueche, Tortene, Gugelhopf ond Hefezöpf gholt. Ond wie die zwoi no nach Bonn omzoge send, hat mei Dote bis zletzt no äll Christtag die Sprengerle, Guetsle ond Ausstecherle en dui Villa Hammerschmidt schicke därfe, ond se hend emmer so lieb Dankschee gsait ond gschriebe.
Ond oineweg dass emmer wieder von dr FDP/DVP ond andere reachte Leut em Blättle ond em Gmeinderat gfordert worde isch, dass an des Degerlocher Haus a Gedenktafel für den Stuegerter Ehrebürger nakomme soll, hend die Knicker Klett, Rommel & Schuster nie en Pfennig drfür übrig ghet. Ond deswege hat se halt sei Degerlocher Verwandtschaft en d’Händ gnomme zom 50.Todestag von dr Elly anno 2002. Gmacht hat se dr Markus Wolf ond zahlt hat se mei „Frau Base“ Sibylle Fischer, em Robert Bosch seim Mädle Dr. Margarete Fischer-Bosch ihr Schwiegertochter. Bei dene „uff dr Villa“ en dr Roßhaustraß hat emmer dr Albert Schweitzer gwohnt, wenn’r zom Benefizorgle für sei Spital en Lambarene uff hie komme isch. Der hat ja anno 1908 dui Elly ond den Theodor en Straßburg traut ghet.
Ond bei dere Feier isch au dui Nichte Hanna Frielinghaus-Heuss drbei gwä, dui hat den Bestseller mit dene wonderscheene „Heuss-Anekdoten“ gschriebe ond hat gmoint, der „Herr Vetter“ sott no meh so Denkmal für ihren Onkel mache lasse. Ond mir hend gfolgt, Heilbronn isch ebbes worde ond Sielmenge, aber für dui deutsch-franzeesische Tafel an dr Hochzichskirch en dere Stuegerter Partnerstadt Straßburg zom 100.Hochzichstag hend mr au nach jetz sechs Jahr no koi Antwort kriegt aus dem Rathaus uff onser (kostenloses) Agebot, trotzdem dass mr da em Blättle emmer wieder amol nachgfragt hend… Dui ganz Gschicht isch en dem neue Hochdeutsch-Buech dren. Ond der resignierende Verf. stoht en seiner Wohltätigkeitsgschaftelhuberei au am nächste ond übernächste Sonntich de gschlagene Tag bis en d’Nacht nei uffem Schlossplatz rom ond signiert, au wenn er (inflationsbedingt) sei Provisio von seither 0,0 Promille jetz uff satte 0,0 Prozent uffgschlage hat…
NACHTRAG:
Raffs Raritäten CMXVII
Von Staatsoberhäuptern und Weltraumpionieren
Dr. Raff erinnerte auch nochmals an Ernst Stuhlinger und Theodor Heuss.
Auch mit Rücksicht auf den heutigen 85.Geburtstag von Manfred Rommel seligen Angedenkens möchte der Verf. die beiden eigentlich anstehenden Jubilare des Dreikaiserjahresjahrgangs 1888, die zwei politisch so gegensätzlich gesonnenen Herren Wilhelm Murr (*16.Dezember 1888 in Esslingen, Gauleiter und Reichsstatthalter in der Villa Reitzenstein, +14.Mai 1945 in Egg in Vorarlberg durch Selbstmord) und Dr. Friedrich Wolf (*23.Dezember 1888 in Neuwied, Arzt und Schriftsteller in der Zeppelinstraße, +5.Oktober 1953 in Lehnitz bei Berlin an Herzinfarkt, Vater des Stasihäuptlings Markus W. 1923 Hechingen – 2006 Berlin und des Filmregisseurs Konrad W. 1925 Hechingen – 1982 Berlin) stillschweigend übergehen und angesichts so vieler und überaus positiefer Leserreaktionen lieber nochmals an die vorangegangenen Jubilare Heuss und Stuhlinger erinnern.
So hat sich beispielsweise kein Geringerer als der erste bundesdeutsche Weltraumfahrer Ulf Merbold gemeldet und unter anderem geschrieben: „Über Ihre Würdigung Ernst Stuhlingers habe ich mich sehr gefreut. Mit ihm habe ich viele Stunden zugebracht, um über die Zukunft der Raumfahrt nachzudenken und zu diskutieren. Mehrfach hatte er mich aber auch zu Tee oder zu einem Glas Wein zu sich nach Hause eingeladen. Jede Minute – ein Gewinn. Traurig bin ich, weil wir beide es nicht geschafft haben, miteinander im Segelflugzeug zu fliegen. Ich hatte es ihm versprochen.“ Alle weiteren Schreiber/innen rühmen ebenfalls die bei so viel pfauenhafter Prominenz und Wichtigtuern heutzutage bemerkenswerte und außergewöhnliche Liebenswürdigkeit, Freundlichkeit und Bescheidenheit dieses weltbewegenden Weltraumpioniers. Und über einen bekannten Stuttgarter Wohltäter schweizerischer Nation war zu erfahren, dass die einer elektrotechnisch hochbegabten Gelehrtenfamilie der TH Stuttgart und dem Inflationsjahrgang 1923 entstammende Witwe Irmgard Stuhlinger, des schönen Liedes „I came from Alabama“ eingedenk, immer wieder aus Huntsville einfliegt und die alte Heimat und ihren Bruder, den Arzt Dr. Werner Lotze in Vaihingen auf den Fildern, besucht.
Die hier zu dessen 50.Todestag abgedruckten persönlichen Erinnerungen an den Degerlocher Mitbürger und Vetter Theodor Heuss haben Frau Dr. Karin Haug vom SWR spontan bewogen, selbige ihrem Landesschaubeitrag von der Kranzniederlegung des Christian-Wulff-Nachfolgers Joachim Gauck auf dem Waldfriedhof hinzuzufügen. Was die natürliche Folge hatte, dass sich zahlreiche Leser und Zuschauer beiderlei Geschlechts gemeldet haben, um Näheres über ihre eigene Verwandtschaft mit „Papa Heuss“ zu erfahren. Im Hinblick auf seinen mittlerweile ohnehin nicht mehr zu bewältigenden Postberg bittet der Verf. inständig darum, selbige genealogische Beziehungen selber in dem Aufsatz des Metzinger Stadtarchivars Rolf Bidlingmaier „Vorfahren des Bundespräsidenten Theodor Heuss auf den Fildern“ im Dezemberheft 1992 der „Südwestdeutschen Blätter für Familien- und Wappenkunde“ im Lesesaal der Landesbibliothek gebührenfrei nachzulesen…
Dann war unter den Käufern von Raffs neuestem (hochdeutschem) Benefizbestseller am Stand von „Weihnachtsmann & Co“ auch Theodors freundlicher Haus- und Hoffriseur, der Herr Herbert Nemluwil aus Gerlingen, der dem vormaligen Staatsoberhaupt seit 1959 und bis zuletzt die schönen Haare geschnitten hat und noch etliches über dessen durch die schädliche Raucherei schwer getrübten letzten Lebensabschnitt zu berichten weiß…
Und der nicht nur von Verlegern wie Josef Eberle und Dieter von Holtzbrinck hochgeschätzte Dieter Mauz, Enkel von Familie Heussens Brackenheimer Dienstmädle und Noch-Inhaber des traditionsreichen Antiquitätengeschäfts Schaible, vormals im Hegelhaus, nunmehr in der Eberhardstraße 6, hat dem Verf. einen eigenhändigen Brief vom 1.September 1949 (zehnter Jahrestag des Kriegsausbruchs) des zwölf Tage danach in Bonn zum Bundespräsidenten gewählten damaligen Bewohners des hiesigen Hauses Löwenstraße 86 an seinen (in so mancher schönen Heuss-Anekdote verewigten) Persönlichen Referenten Hans Bott (aus dessen Nachlass) geschenkt. Dankschee, und ein kleiner Hinweis an die möglicherweise dafür dankbare autochthone Leserschaft: Bei dem am 130. Geburtstag von Theodor Heuss endenden Räumungsverkauf (wg. Geschäftsaufgabe aus Altersgründen) sind noch weitere derartige Raritäten der Stuttgarter Stadtgeschichte zu haben…
Und noch was: Nachdem das derzeitige Stuttgarter Stadtoberhaupt die Suche nach dem gemopsten Mops auf dem Loriot-Denkmal am Eugensplatz zur Chefsache erklärt hat, besteht wieder Hoffnung, dass das bereits 2007 gestiftete und trotz mehrfachen Mahnens von der vorigen Administration vertranfunzelte doiiitsch-fransööösische Denkmal in Stuttgarts Partnerstadt Straßburg zum 100.Hochzeitstag des vom späteren Friedensnobelpreisträger Albert Schweizer getrauten nachmaligen Stuttgarter Ehrenbürgers Theo mit seiner elsässischen Elly doch noch Wirklichkeit werden könnte….
Uich älle en scheene Christtag! Ond bleibet/werdet xond!
Raffs Raritäten CCCXXXII
Elly & Theodor
Zum 50.Todestag von Elly Heuss-Knapp erinnerte Dr. Raff an die Degerlocher Jahre des ersten deutschen Bundespräsidenten und seiner Gemahlin.
Des sei a ganz liebs ond freundlichs Weib gwä, hat mei Dote Aline emmer verzählt, dui hat schräg vis-à-vis von ihr en dr Löwestraß gwohnt ond a Conditorei ghet. Ond a ganz gscheite Frau sei se gwä, dui Elisabeth Eleonora Anna Justine Heuss-Knapp, genannt Elly. Koi Wonder, ihr Vatter isch a berühmter Professer gwä für Nationalökonomie ond ihr Großvatter a berühmter Chemiker, ihr Muetter aber isch a Adelige aus Georgien gwä.
Ond se hat ihren zwangsweise stellungslose Theodor die ganze lange tausend Jahr von 1933 bis 1945 als Werbetexterin für Nivea-Crem, Kaffee Hag ond Knorr-Suppe durchgfuetteret. Ond em Sommer 1945 send se von Handschuhsheim bei Heidelberg uff hie nach Degerloch zoge. Ond er isch Kultminister (ohne US!) worde ond äll Morge mit dr Straßebah oder dr Zahradbah ens Gschäft gfahre.
Ond isch en Degerloch so richtig drhoim gwä. Denn sei Vatter isch wohl vom Onterland, aber scho seim Vatter sei Muetter isch vo hie. Ond wer’s net glaubt, der soll’s halt beim Heuss selber en seine Jugenderinnerunge „Vorspiele des Lebens“ nachlese: „Eine in ihrem Gesamtumfang noch unveröffentlichte schwäbische Genealogie, die über die Großmutter Kallenberger auf die Filder und nach Degerloch führt, hat mich beinahe eingeschüchtert, denn nun drängen sich, von dem württembergischen Kernland aus, die ‚Vettern’ mit Namen: Gustav Schwab und Karl Gerok, Gustav Schmoller und Gustav Rümelin, Julius Haußmann und Max Eyth, Friedrich Theodor Vischer und Ottilie Wildermuth, Georg Herwegh und Karl Mayer, Philipp Matthäus Hahn und Gustav Werner, Wilhelm Maybach und Ernst Heinkel – es hört gar nicht auf. Völlig ahnungslos bin ich in die eigentümlichste, so kontrastreiche wie anregende Gesellschaft geraten.“
Ond der Rolf Bidlingmaier, der jonge Stadtarchivar von Metzinge, hat en seim Uffsatz „Vorfahren des Bundespräsidenten Theodor Heuss auf den Fildern“ em Wirtebergische Genealogeblättle 1992 nachgwiese, dass der dank Degerloch sogar fürstlichen Geblütes isch: über sei Urahne Eva Raffin (+1611, „an der Pest“), Ehefrau vom Magister Christophorus Raffius (+1591, „Ahnherr von Bauern, Bundespräsidenten und Königen“), stammt er von de Grafe von Wirteberg ond damit automatisch von dene Kaiser ond Keenich von ganz Europa ab.
Seit jetz bald 40 Jahr isch emmer wieder en dr Zeitong gfordert worde, dass an des Haus en dr Löwestraß 86 a Täfele nakomme soll, aber weder dr Klett, noch dr Rommel oder dr Schuster hend gfolgt. Jetz aber zom 50.Todestag von dr Elly hat sich dui Verwandtschaft mit Albert Schweitzer (wo oft ond gern nach Degerloch komme isch) gsait: „Was nicht zur Tat wird, hat keinen Wert!“ Ond dui Schwiegertochter vom Bosch seim Schwiegersohn Dr.Otto Fischer, onser Bäsle Sibylle Fischer aus Ludwigsburg, hat dui Tafel gstiftet, dr Markus Wolf aus Plieninge hat se gmacht ond dr Rudolf Metzger, dr Chef von dr Gießerei vom Gottlieb Daimler en Mettinge, hat se omesonst gosse. Ond der jonge Schreiner Matthias Schwandner hat den brüchige Holzzau vor dem Haus wieder schee hergrichtet, zom Nulltarif. Dank schee!
Ond der freundliche Dr.Thomas Hertfelder vom Heuss-Haus uffm Killesberg hat dui Feier(halbe)stond organisiert ond morge am halb viere, da wird dui Bronzetafel eigweiht, ond jeder därf komme, net bloß die Großkopfete, ond dui Frau Stadtschultheiß Gabriele Müller-Trimbusch, dui Frau Anne Schilling vom Müttergenesungswerk ond der Enkel Dr.med. Ludwig-Theodor Heuss aus Basel schwätzet a bißle ebbes. Ond dr Degerlocher Posaunechor spielt des gleiche Lied, was sich des Ehepaar Heuss als Ständle gwönscht hat, wie se anno 49 vo hie uff Bonn zoge send: „Preisend mit viel schönen Reden“.
Ond inskünftig woiß jetz jede(r), wo an dere Löwestraß 86 vorbeikommt:
„IM ERDGESCHOSS DIESES HAUSES/ WOHNTEN VON 1945 BIS 1949/
THEODOR HEUSS/ BRACKENHEIM 1884-1963 STUTTGART/ MITGLIED DES REICHSTAGES/ KULTMINISTER VON WÜRTTEMBERG-BADEN/ MITGLIED DES PARLAMENTARISCHEN RATES/ ERSTER PRÄSIDENT DER BUNDESREPUBLIK DEUTSCHLAND/ UND SEINE IHM 1908 VON ALBERT SCHWEITZER/ ANGETRAUTE EHEFRAU/ ELLY HEUSS-KNAPP/ STRASSBURG 1881-1952 BONN/ GRÜNDERIN DES MÜTTERGENESUNGSWERKES.“
Raffs Raritäten CCCCXI
Honoriger Heuss
Dr. Raff erinnerte an Theodor Heuss. Der erste Präsident der Bundesrepublik Deutschland erhielt die Ehrenbürgerwürde der Stadt Stuttgart verliehen.
Mir Wirteberger hend dem deutsche Vatterland bis jetz zwoi Fönf-Sterne-Bundespräsidente gschenkt, den Theodor Heuss (von 1949 bis 1959) aus Brackeheim ond den Richard Freiherr von Weizsäcker (von 1984 bis 1994) aus Stuegert. Ond weil se boide so Prachts- ond Hauptkerle gwä send, hat mr se au zu Ehrebürger vo Stuegert gmacht. Vor fuffzich Jahr onsern Freund, Vetter ond Landsmann Heuss zu seim 70.Geburtstag am 31.Januar.
Bereits am 25.Januar hat dui Stuegerter Zeidong den gscheite Kerle willkomme ghoiße mit ebbes ganz Bsondrem, dem ällererste ladeinische Gedicht vom Herr Chefredaktör Josef Eberle. (Der hat’s dadruff na so richtig verschmeckt ond statt wie seither als Sebastian Blau uff schwäbisch, hat der drnach als Josephus Apellus uff ladeinisch dichtet ond isch mit dr Zeit „der bedeutendste lateinische Dichter der Gegenwart“ worde). Ond des Poem hoißt:
SALVE
MACTE PATER PATRIAE!
AVE THEODORE!
VRBS EXSVLTAT LAVDANS TE
SVEVO SVAVI ORE.
DIGNVS ES HONORVM BIS:
CIVIVM EXEMPLVM
AC ORNATOR LITTERIS
INTELLECTVS TEMPLVM
VIR QVEM AMANT LITTERAE
NON ERAT IN AEVIS
PRAESVL REI PVBLICAE
NEC CVM SVIS SVEVIS.
(Dui Übersetzung, hat dr Herr Professer Eberle seinerzeit gmoint, ka sich „aus Platzgründen der des Lateinischen unkundige Leser beim Herrn Pfarrer oder Herrn Lehrer oder notfalls beim Verfasser selber besorgen“).
Am gleiche Tag hat der „Baureschultes“ Arnulf Klett dem Bundespräsidente den Grabstoi für „seine ihm 1908 in St.Thomas zu Straßburg von Albert Schweitzer angetraute Ehefrau“ Elly Heuss-Knapp uff ihrem Ehregrab em Waldfriedhof gschenkt, ond dr Theodor hat gwißt, ame scheene Tag leget se mi drnebe na.
Am Tag druff hat dr Klett em Kursaal en Cannstatt „das Schönste und Höchste“ verliehe, „was eine deutsche Stadt einem deutschen Mann schenken kann, den Ausdruck herzlicher Verbundenheit und verehrender Liebe“: dui Ehrebürgerschaft. Ond dui Urkunde hoißt so:
„Die Stadt Stuttgart verleiht durch Beschluß ihres Gemeinderats Bundespräsident Professor Dr. Theodor Heuss, dem wackeren Schwaben, dem treuen Hüter des geistigen Erbes unserer Ahnen, dem mutigen Kämpfer für Demokratie in Freiheit, dem Wegbereiter eines friedlich geeinten neuen geistigen Deutschland, aus Anlaß der Vollendung seines 70.Lebensjahres das Ehrenbürgerrecht in dankbarer Anerkennung seiner geschichtlichen Leistung für Heimat und Vaterland. Stuttgart, den 31.Januar 1954. Der Oberbürgermeister.“
Ond am gleiche Tag verleiht der Rektor von dr Technische Hochschuel Stuegert, der Professer Rolf Gutbier, „auf einmütigen (!) Beschluß des Großen Senats Herrn Bundespräsidenten Professor Dr. rer. pol. und D. theol. h. c. Theodor Heuss, der durch hervorragende Werke über bedeutende Ingenieure und Künstler die Wissenschaft bereichert und die Technik gefördert hat, der in sich selbst die Idee des Staatsmannes in einer für immer vorbildlich bleibenden Weise verwirklicht und den die Technische Hochschule Stuttgart mit Stolz zu ihrem Lehrkörper zählt, die Würde eines Dr.-Ing. E. h.“
So hoch geehrt isch’r wieder ens Gschäft nach Bonn gange ond hat sei Sach wonderbar gschafft, bis se no den begnadete Komi- ond Rhetori-ker Hei-ni Lüb-ke aus dem Sauerland als Präsidente naglasse hend, ond am 16.September 1959 isch dr Theodor en sei neus Häusle em Feuerbacher Weg eizoge.
Vier Tag druff isch sei zwoi Jahr älterer Brueder, der Professer Dr. Hermann Heuss, wo seit 1949 em Theo seim alte Häusle en dr Degerlocher Löwestraß gwohnt hat, beim Spazierelaufe vome Stuegerter Motorradfahrer beim Übergang an dr Reutlenger Straß totgfahre worde.
Vier Jahr druff, am 12.Dezember 1963 isch no au dr Theodor als letzter von dene drei Heuss-Buebe gstorbe, ond mr hat ihn en heimatlicher Erde, bei seine Degerlocher Vetterle ond Vorfahre vergrabe.
Raffs Raritäten DX
„So bist du mir Heimat geworden“
Dr. Raff erinnerte an Elly Heuss-Knapp. Die Frau des ersten Bundespräsidenten Theodor Heuss wurde 1881 in Straßburg geboren.
Dui Elly hoißt eigentlich Elisabeth Eleonore Anna Justine ond isch am 25.Januar 1881 a Dreiviertelstond nach Mitternacht en Straßburg uff d’Welt komme. En dere (seit dem gwonnene Siebzger Krieg wieder amol deutsche) Stadt isch ihr Vatter Georg Friedrich Knapp a berühmter Professer für Nationalökonomie gwä, ond der hat a „Mädchen aus Morgenland“ zom Weib ghet, sei Lydia, geborene von Karganow, a Offizierstöchterle aus georgischem Adelsgschlecht, wo bei ihm en dr Vorlesung ghockt isch, ond dere ihr Muetter isch sogar a Fürstin Bebutow. Ond bald druff isch dui Lydia krank worde, ond dui Elly isch zu ihrem Großvatter komme nach Braunschweig, zu dem Chemiker ond Geheime Rat Friedrich Ludwig Knapp, dem sei Weib isch a Schwester gwä vom Suppewürfel- ond Konstdöngererfinder Justus von Liebig. Ond dort em Braunschweiger Dom isch se au daift worde. Ond an dem Großvatter isch se seiner ond ihrer Lebtag lang arg ghangt.
Wieder drhoim en Straßburg därf se no uff a Privatschuel für höhere Töchter, aber des meiste kriegt se doch in ihrem Elternhaus mit, wo so viele gscheite Leut aus- ond eiganget, ond se schreibt amol: „Ich habe sehr wenig aus Büchern gelernt, aber umso mehr von bedeutenden Menschen. Das ist ein Glück, für das man nie genug danken kann.“ Ond mit achtzehn macht se ihr Exame als Lehrerin, ond anno 1900 gründet se mit andere gscheite Fraue dui erste „Fortbildungsschule für Mädchen“ en Straßburg ond schafft dort, bis die Weibsbilder endlich au studiere därfet. Ond anno 1905 goht se an dui (von der guten ond gscheiten Mechthild von der Pfalz 1457 gegründete) Universität Freiburg em Breisgau ond studiert Volkswirtschaft. Wechselt aber bald druff nach Berlin ond trifft dort bei dem hochverehrte „Pfarrer, Politiker und Sozialreformer“ Friedrich Naumann den drei Jahr jöngere Theodor Heuss aus Heilbronn. Ond die zwoi Studente schreibet sich jetz so scheene Liebesbrief, ond wer will, ka die sogar nachlese: „So bist Du mir Heimat geworden. Eine Liebesgeschichte in Briefen aus dem Anfang des Jahrhunderts“ (Stuttgart 1986). Ond am 11.April 1908 traut der (spätere Friedensnobelpreisträger) Albert Schweitzer die zwoi Glückliche en dr Wilhelminerkirch en Straßburg.
Anno 1910 em August kommt no ihr erstes ond oinziges Kend uff d’Welt, der Ernst Ludwig, ond an dere Geburt wär se fast gstorbe. Ond em September erscheint ihr erstes Buech „Bürgerkunde und Volkswirtschaftslehre für Frauen“ ond wird glei a Bestseller. Ond jetz könnt ond müeßt mr dui ganz Zeidong da fülle, mit dem, was dieses gscheite, fleißige ond au fromme Weibsbild älles gschafft, gleistet ond bewirkt hat als „Sozialreformerin – Publizistin – Webefachfrau – Politikerin – First Lady“. Am beste, Ihr ganget en des Theodor-Heuss-Haus uffem Killesberg em Feuerbacher Weg 46 ond gucket Euch dui Ausstellung a ond nemmet dort des ausführliche Gedenkblatt von dr Elly mit.
Deshalb hier bloß soviel: Anno 1912 zieget se mitnander uff Heilbronn, anno 1918 wieder uff Berlin. Ond se schafft sich für ihr Vatterland ond ihr Frauebewegung schier z’tot ond holt sich mit dr Zeit a Herzleide. Ond no kommt der Hitler an dui Macht, ond ihr Theodor verliert deswege sei Gschäft, ond jetz därf ond mueß sui dui Familie alloi durchfuettere, ond se macht jetz Werbung für älle mögliche Firme ond Sache wie Persil ond Nivea ond Knorr-Suppe ond Erdal-Schuehwichse ond woißnetwasälles. Ond anno 43 verzieget se wege dene viele Luftagriff weg von Berlin nach Heilbronn ond schließlich nach Handschuhsheim bei Heidelberg. Ond dort isch no dr Krieg aus gwä. Ond no holet se den Theodor als Kultminister nach Stuegert ond se zieget jetz uff Degerloch en dui Löwestraß 86. Ond anno 46 kandidieret boide für dui DVP (jetz F.D.P.) ond werdet äll zwoi en den erste wirtebergisch-badische Landtag gwählt.
Mittlerweil hat sich aber der Theodor au en Bonn so en guete Name gmacht en dem Parlamentarische Rat, dass der Rheinländer Adenauer den Neckartäler Heuss zom Bundespräsidente vorschlägt. Ond am 12.September 1949 isch’s soweit: dui Elly wird dui ällererste „First Lady“ von dere frische Bundesrepublik Deutschland. Ond se zieget von Degerloch weg nach Bad Godesberg, ond am Theodor seim 66.Geburtstag wird ihr so segensreiches „Deutsches Müttergenesungswerk“ gstiftet.
Aber der ganze Staatszirkus wird mit dr Zeit z’viel für ihr schwaches Herz, ond am 19.Juli 1952 stirbt se en Bonn en dr Universitätsklinik. Ond sui hat selber wölle, dass se wieder uff Degerloch kommt, uff de Waldfriedhof. Ond seit 1963 isch au ihr „lieber Dorle“ wieder bei ihr.
Raffs Raritäten DCXXI
Theodor Heuss hält Hochzeit mit Elly Knapp
Dr. Raff erinnerte an Elly Knapp und Theodor Heuss. Der spätere Friedensnobelpreisträger Albert Schweitzer hat das Paar 1908 in Straßburg getraut.
Des Jahr 1908 isch net bloß a Katastrophejahr gwä (Zeppelin Echterdenge, Eigmeindong Degerloch, etc.) sondern au a Glücksjahr für onsern Degerlocher Mitbürger, Freund ond Vetter Theodor Heuss. Ond wenn onser scheene Gedenktafel vom Markus Wolf net uff dem Amtsweg zwischen dem „neuen Herzen Europas“ ond der „Europastadt Straßburg“ – zwische Stuegert ond seiner Partnerstadt- verschimmelt ond verscholle wär, könntet die Leut an dere Straßburger Hochzichskirch en zwoi Sprache lese:
IN DIESER KIRCHE
WURDEN VON DEM SPÄTEREN
FRIEDENSNOBELPREISTRÄGER
ALBERT SCHWEITZER (1875-1965)
AM 11. APRIL 1908 GETRAUT
DIE STRASSBURGER
PROFESSORENTOCHTER
ELLY KNAPP (1881-1952)
UND DER NACHMALIGE
ERSTE PRÄSIDENT DER
BUNDESREPUBLIK DEUTSCHLAND
THEODOR HEUSS (1884-1963)
>SO BIST DU MIR HEIMAT GEWORDEN<
Wie aber kommt der Jong vom Heilbronner Stadtbaumeister Louis Heuss (1853-1903) an des Mädle von dem „namhaften Nationalökonomen“ Georg Friedrich Knapp (1842-1926) en Straßburg. Ganz oifach: Er, dr Theodor, hat grad ausstudiert ond sein Dokter gmacht ghet ond en Berlin als Redakteur gschafft bei dem „Pfarrer, Politiker und Sozialreformer“ Friedrich Naumann (1860-1919). Sui, dui Elly, isch mit dr halbe „Berliner Universitätsaristokratie der Kaiserzeit“ verwandt gwä ond hat a Semester lang an dr Spree studiert, nadierlich au Nationalökonomie. Ond dort beime Vortrag em Haus Naumann em Spätjahr 1905 send sich die zwoi des erste Mal über de Weg gloffe. Ond seit sui Ende März 1906 wieder hoim isch nach Straßburg, hend se sich so richtig goldige Liebesbrief gschriebe, ond wer will, ka die (ganz leicht zensiert) sogar nachlese: „So bist Du mir Heimat geworden. Eine Liebesgeschichte in Briefen aus dem Anfang des Jahrhunderts.“Zerst send die Brief vom „lieben Dorle“ an dui „liebe Elli“ ond retour no a bißle arg steif, ond se bleibet au no a ganz Jahr beim „Sie“. Erst wie sui em März 1907 wieder für a paar Woche nach Berlin kommt, saget se „Du“ zuanander ond verlobet sich sogar hählenge. Ond wie sui Mitte April wieder hoim mueß mit dr Eisebah, da hockt er am Schreibtisch ond „überlegt, durch welche Gegenden du jetzt fährst.“ Ond hat glei so a Hoimweh ond Sehnsucht nach ihr, dass’r uff dr Stell en Brief schreibt ond ihr verratet: „O Elli, ich hab’ Dich ja so lieb, und ich kann noch gar nicht sagen, wie froh und reich und glücklich und ruhig Du mich gemacht hast. Nun weiß ich ein Ziel und eine Stütze, und die führen mich sicher und stark aus der Blüte zur Reife. Und dann zwingen wir zusammen das Leben und bauen uns ein stolzes und reines Glück.“
Ond sui hat ihm glei zrückgschriebe: „Ich bin ganz bei Dir, Goldener! Fühlst Du’s?“ Ond hat ihn „zu Weihnachten“ nach Straßburg eiglade: „Dann sagen wir’s dem Papa und dann dem Naumann.“ Ond jetz isch dui Reichspost richtig reich worde an dene zwoi, fast jeden Tag hend se anander gschriebe ond wie lieb, ond zom Christtag kommt er endlich für a paar Tag nach Straßburg. An Silvester aber isch’r scho wieder en Berlin ond muess schaffe. Ond jetz wird dui ganz Hochzich mit älle Einzelheite bis zur Tischordnung „auf postalischem Wege“ vorbereitet
Ond am Karsamstich isch’s no soweit: Am halb zehne „Ziviltrauung“ ond am zwölfe „Trauung in der Kirche“. Ond se versprechet vorem Herrgott ond dem Pfarrer Albert Schweitzer, daß se beinander bleibet „in guten wie in bösen Tagen bis dass der Tod Euch scheidet.“ Ond so hend se’s no au ghalte, ond wie anno 33 die „bösen Tage“ komme send, wär der guete Kerle verhongret, wenn’r sei Elly net ghet hätt. Ond als Dankschee wird se am 12.September 1949 dui ällererste „First Lady“ von dere nagelneue Bundesrepublik Deutschland.
Ond am Theodor seim 66.Geburtstag isch ihr segensreiches „Deutsches Müttergenesungswerk“ gstiftet worde. Aber der ganze Bonner Staatszirkus isch z’viel für ihr schwaches Herz, ond am 19.Juli 1952 hat dr Tod die zwoi viel zu bald gschiede. Aber scho anno 63 hat’r die zwoi wieder zammebracht uffem Degerlocher Waldfriedhof. Ond jetz hoffet mr halt herzinniglich, dass wenigstens zom Theodor seim 125.Geburtstag, am 31.Januar 2009, dui von dr Degerlocher Verwandtschaft gstiftete Gedenktafel en Straßburg hangt…
Raffs Raritäten DCXXXXIV
„Zuweilen muß einer da sein, der gedenkt“
Dr. Raff erinnerte an den Dichter Albrecht Goes und seinen Vetter Paul Goes (Landrat in Göppingen).
Es haben wohl viele Leser im stillen Kämmerlein sich und etliche auch den Verfasser höchstpersönlich gefragt, ob das mit den „über 80 Denkmälern und Gedenktafeln“ stimmen könne, die da im Laufe der Jahre als Nebenprodukte von „Raffs Raritäten“ in halb Europa entstanden sein sollen. Ja, das stimmt. Da wir aber hier nicht den Platz haben, um diese fast sieben Dutzend zumeist von Markus Wolf geschaffenen Werke alle einzeln aufzuzählen, müssen wir uns auf die paar Denkmäler des vierten Vierteljahres des „annum Domini MMVIII“ exemplarisch beschränken und sie diese halt auf die ganzen Jahre hochrechnen.
Der dem Verfasser zwei Jahrzehnte lang freundschaftlich verbunden gewesene Dichter Albrecht Goes (1908-2000) hat einmal geschrieben: „Zuweilen muß einer da sein, der gedenkt.“ Wir müssen diesen Satz im Hinblick auf die hie und da allübermächtige Bürokratie und ihr Lamaphlegma ergänzen: „Denken ist Glücksache. Gedenken aber auch…“ So hat Albrecht Goes zwar mittlerweile problemlos Wolfsche Denkmäler an seinem Geburtshaus in Langenbeutingen, an seinem Wohn- und Sterbehaus in Rohr, am Albrecht-Goes-Platz in Stuttgart und den von Richard von Weizsäcker gestifteten Gedenkstein am Pfarrhaus von Gebersheim erhalten, die termingerecht zu seinem 100.Geburtstag am 22.März vorgesehene Bronzetafel für das Tübinger Stift kann aber erst mit achtmonatiger Verspätung am 14.November enthüllt werden. Ebenso wird diesen Herbst noch die seit Jahren fertiggestellte Tafel für „die schwäbische Geistesmutter“ Regina Burckhardt-Bardili (1599-1669) und ihren Bruder, den Kanzler Andreas Burckhardt (1594-1651), den „Retter des Lands im großen Krieg“, an deren unterdessen dankenswerterweise von Herrn Oberbürgermeister B. Palmer wieder hergerichtetem Tübinger Geburts- und Wohnhaus angebracht werden.
Raffs Raritäten DCLX
Lieber Landsmann, hochgeschätzter Herr Vetter Heuss!
Dr. Raff erinnerte an den in Brackenheim geborenen ersten Bundespräsidenten und Stuttgarter Ehren- und Degerlocher Mitbürger Theodor Heuss.
Lieber Vetter Theodor!
Zu Deinem 70. Geburtstag vor 55 Jahren hat die Stadt Stuttgart Dir, „dem wackeren Schwaben, dem treuen Hüter des geistigen Erbes unserer Ahnen, dem mutigen Kämpfer für Demokratie in Freiheit, dem Wegbereiter eines friedlich geeinten neuen geistigen Deutschland“ mit vollem Recht das Ehrenbürgerrecht verliehen und Deiner Elly und Dir zur Feier des Tages den Grabstein auf dem Waldfriedhof geschenkt. Und der Herr Josef Eberle, der Mitbegründer, Herausgeber und Chefredakteur dieses vorliegenden Intelligenzblattes, hat Dir als ganz besonderes Geburtstagspräsent sein allererstes lateinisches Gedicht verfasst:
„SALVE
MACTE PATER PATRIAE!
AVE THEODORE!
VRBS EXSVLTAT LAVDANS TE
SVEVO SVAVI ORE.
DIGNVS ES HONORVM BIS:
CIVIVM EXEMPLVM
AC ORNATOR LITTERIS
INTELLECTVS TEMPLVM
VIR QVEM AMANT LITTERAE
NON ERAT IN AEVIS
PRAESVL REI PVBLICAE
NEC CVM SVIS SVEVIS.”
Und als Du im September 1959 Dein Bonner Amt dem Heini Lübke, jenem begnadeten Gründer der gleichnamigen, auch heute noch stilbildenden Rhetorikerschule aus dem Sauerland, überlassen hast und Du in Dein Häusle auf dem Killesberg gezogen bist, da haben Dir Deine Stuegerter einen Empfang bereitet wie später nur noch dem Charles de Gaulle (Vorfahren aus dem Ammertal), der Elizabeth II. (Oma Queen Mary von Teck) und den Klinsmännern. Und grad so war’s ja dann auch bei Deiner schönen Leich im Dezember 1963, als man Dich in Degerlocher Heimaterde beim vorangegangenen Freunde Robert Bosch beigesetzt hat
Du hast ja in Deinen Jugenderinnerungen „Vorspiele des Lebens“ selber geschrieben: „Eine in ihrem Gesamtumfang noch unveröffentlichte schwäbische Genealogie, die über die Großmutter Kallenberger auf die Filder und nach Degerloch führt, hat mich beinahe eingeschüchtert, denn nun drängen sich, von dem württembergischen Kernland aus, die ‚Vettern’ mit Namen: Gustav Schwab und Karl Gerok, Gustav Schmoller und Gustav Rümelin, Julius Haußmann und Max Eyth, Friedrich Theodor Vischer und Ottilie Wildermuth, Georg Herwegh und Karl Mayer, Philipp Matthäus Hahn und Gustav Werner, Wilhelm Maybach und Ernst Heinkel – es hört gar nicht auf. Völlig ahnungslos bin ich in die eigentümlichste, so kontrastreiche wie anregende Gesellschaft geraten.“ Und dank dem rührigen Rolf Bidlingmaier, Stadtarchivar von Metzingen, und seiner Abhandlung „Vorfahren des Bundespräsidenten Theodor Heuss auf den Fildern“ hast Du posthum erfahren, dass Du – wie übrigens auch Dein Kollege Weizsäcker – ein Nachkomme jenes 1591 verstorbenen und in der Degerlocher Michaelskirche ruhenden „Magister Christopherus Raphius, Nagoltensis“ bist, jenes fruchtbaren „Ahnherrn von (Degerlocher) Bauern, (deutschen) Bundespräsidenten und (dänischen) Königen“. Und dass dessen 1611 an der Pest verstorbene Ehefrau Eva Dir mit ihrer hochfürstlich wirtembergischen Abstammung fast sämtliche deutschen Kaiser und europäischen Könige des Mittelalters auf Deine Ahnentafel gebracht hat.
Und deshalb ist meine Patentante, die „Dote Aline“ ja auch so ein „Bäsle“ von Dir gewesen, aus deren Konditorei in der Löwenstraße 83 Deine Elly immer ihre Kuchen, Torten und Hefezöpfe in Euer Haus in der Löwenstrasse 86 holte, und die Dir bis zuletzt noch äll Christtag die Springerle, Gutsle und Ausstecherle nach Bonn in die Villa Hammerschmidt schicken durfte. Und natürlich auch meine Mutter, vor der Du als Pensionär auf dem Bänkle im Ramsbachtal hockend freundlich grüßend den Hut gezogen hast, als sie dort mit ihrem letzten Degerlocher Kuhfuhrwerk das Heu heimholte.
Und darum hat Dir Deine hiesige Verwandtschaft ja auch die unter Klett, Rommel und Schuster immer wieder vergeblich in Presse und Gemeinderat geforderte Gedenktafel in der Löwenstraße gestiftet termingerecht zum 50.Todestag Deiner Elly. Und im Sommer 2006 kam die schöne Bronzetafel an dem 1892 von Deinem Vater Louis erbauten Heusshaus in Heilbronn in der Lerchenstraße 43 dazu, wo Du und Deine Brüder Ludwig und Hermann die Jugendjahre verbracht haben.
Und jetzt wollten wir Dir auch noch eine Tafel zum 100.Hochzeitstag in Strassburg stiften mit der zweisprachigen Inschrift
„IN DIESER KIRCHE
WURDEN VON DEM SPÄTEREN
FRIEDENSNOBELPREISTRÄGER
ALBERT SCHWEITZER 1875-1965
AM 11.APRIL 1908 GETRAUT
DIE STRASSBURGER
PROFESSORENTOCHTER
ELLY KNAPP 1881-1952
UND DER NACHMALIGE
ERSTE PRÄSIDENT DER
BUNDESREPUBLIK DEUTSCHLAND
THEODOR HEUSS 1884-1963
>SO BIST DU MIR HEIMAT GEWORDEN<“
Und wir haben am 1.Januar 2008 in einem schönen Brief das Stuttgarter Rathaus gebeten, uns das ganze damit verbundene Bürokratengeschäft mit der Partnerstadt Straßburg abzunehmen – so wie beispielsweise die Kieler Oberbürgermeisterin Angelika Volquartz (Schwiegermutter des scheidenden Stuttgarter Schauspielhausdirektors v.M.) unsere ihr zugeschickte bronzene Gedenktafel für Carl Friedrich Freiherr von Weizsäcker freudig und völlig unbürokratisch mit einer „sehr, sehr, sehr schönen Feier“ (Zitat: Weizsäcker) an dessen Kieler Geburtshaus angebracht hat.
Raffs Raritäten DCCXXXV
Das einzige Kind von Mama und „Papa Heuss“
Dr. Raff erinnerte an den in Schöneberg geborenen Widerstandskämpfer Dr. Ernst Ludwig Heuss.
Wie hoffentlich bekannt, hat der spätere Urwalddokter ond Friedensnobelpreisträger Albert Schweitzer (1875-1965) am 11.April 1908 onsern Freund, Vetter ond Landsmann, den promovierte Journaliste Theodor Heuss (1884-1963) mit der Straßburger Professoretochter Elly Knapp (1881-1952) traut. Ond onser Gedenktafel für die drei liebe Leut en Straßburg isch seit bald drei Jahr finanziert ond beatragt, wird aber wohl wg. der schon mehrfach an dieser Stelle gerügten Tranfunzeligkeit der Straßburger Partnerstadt Stuttgart erst am St. Nimmerleinstag dort bei dr Thomaskirch hangen.
„Es war in Schöneberg im Monat August“ en dr Kaiserliche Reichshauptstadt Berlin, da hat am fönfte Tag ond anno 1910, dui Elly ihr erstes ond oinziges Kend uff d’Welt bracht. Ond des isch so a komplizierte Geburt gwä, dass dui Muetter schier gar dra gstorbe wär. Ond des Büeble hend se Ernst Ludwig daift, aber älle hend ihn „Lulu“ ghoiße nach dere Dichterin ond Heussfreundin Lulu von Strauß und Torney (1873-1956), ond später no „Lutz“. Ond mit dene geniale Gene ond en dem gscheite Milljöh macht der nadierlich nullkommanix Abitur en Berlin ond studiert drnach en Heidelberg Jura ond kriegt 1937 mit dere dank Stuttgart 21 superaktuelle Dissertation „Zulässige und unzulässige Klagen aus Amtspflichtverletzung“ den Dokter jur. uff sei Visitekart nuffdruckt.
Hat selbstverständlich bei some Vatter ond sore Muetter, ond weil’r au selber offe drgege gwä isch, bei dene braune Brüeder koin Poste beim Staat kriegt ond isch deswege en d’Wirtschaft gange. Aber wie no dr Krieg agfange ond fast älles mit Schirmkappe oder mit Stahlhelm hat romdappe müesse, da hend se den uffrichtige jonge Ma doch braucht ond ihn en Berlin zom Chef von dere „Reichsstelle Leder“ befördert. Ond en dere Funktion hat’r viele politisch ond rassisch verfolgte Leut helfe könne. Ond hat au selber „tapfer und todesmutig beim deutschen Widerstand“ mitgmacht onter anderem en dem Kreis om den aus Cannstatt gebürtige, anno 33 als Bürgermeister von Berlin nausgschmissene Fritz Elsas (1890-1945, ombracht em KZ Sachsenhausen) ond om den frühere Leipziger Oberbürgermeister Carl Friedrich Goerdeler (1884-1945, ombracht em Zuchthaus Plötzensee). Ond der Brueder vom Dietrich Bonhoeffer (1906-1945, ombracht em KZ Flossenbürg), der Klaus Bonhoeffer (1901-1945, ombracht uffem Weg vom Gestapogfängnis Lehrter Straße zur Gestapozentrale em Prinz-Albrecht-Palais) isch sei Freund gwä, ond den hätt’r, so wien’r etliche andere Widerstandskämpfer „in den Schlusswirren des Krieges in einer waghalsigen Aktion aus dem Berliner Gefängnis Moabit befreit“ hat, laut Bonhoeffers Witwe au no aus dem Kerker rausgholt, wenn der doch bloß no dren gwä wär…
Nach dem Krieg hat’r em Sommer 45 dui Hanne Elsas, a Tochter vom Fritz Elsas ond glernte Gärtnerin, gheiratet ond 1947 von ihr oi Mädle kriegt, dui Barbara. Ond wie dui Hanna anno 1958 ganz tragisch gstorbe isch, da hat’r em Jahr druff dui Ursula Wolff (1929-2010) gheiratet. Des isch a Tochter gwä von dere Psychologin ond Widerständlerin Annemarie Wolff-Richter (1900-1945, ombracht em KZ Jasenovac). Ond der Professer Helmut Gollwitzer (1908-1993) hat die zwoi traut. Ond anno 1961 isch der Ludwig Theodor Heuss uff d’Welt komme, der schafft jetz als Chefarzt en dr Schweiz ond isch dr Vorsitzende von der von seim Vatter mitgstiftete „Theodor-Heuss-Stiftung“, ond schwätzt grad so schee wie sei Großvatter, wenn dronternei doch amol a Heuss-Denkmal eigweiht wird.
Der Ernst Ludwig Heuss aber, der isch nachm Krieg von Berlin ens Markgräfler Land omzoge ond anno 1946 Direkter ond Chef von dere Halstablette-, Hustebomboles- ond Elmex-Aronal-Zahpastafabrik „Wybert GmbH“ en Lörrach worde. Desell hat eme Basler Vetter von seiner Muetter ghairt, ond für die hat dui Elly scho vorem Krieg Reklame mache därfe („Ob’s windet, regnet oder schneit, Wybert schützt vor Heiserkeit.“) ond hat so ihren „aus politischen Gründen erwerbslosen Ehemann“ Theodor durchgfuettret. So dass der no anno 49 von Degerloch aus nach Bonn gange ond für zehn Jahr a Prachtskerle von Bundespräsident hat werde könne. Ond wie der guete Ma anno 63 hauptsächlich wege seiner viele Zigarrequalmerei uffem Degerlocher Waldfriedhof direkt nebe sei Elly glegt worde isch, hat au ihr gotzigs Kend nemme lang lebe därfe ond isch am 14.Februar 1967 en Lörrach gstorbe ond dort uffem Hauptfriedhof vergrabe worde.
